11 Dekabr 2018 0:00

Daha bir qrup tələbə metropolitendə təcrübə keçir

Real iş rejimi şəraitində

"Bakı Metropoliteni" QSC ilə Azərbaycan Dövlət Neft və Sənaye Universiteti (ADNSU) arasında kadr hazırlığı üzrə qarşılıqlı anlaşmaya əsasən, 2016-cı ildən bu ali təhsil ocağının tələbələri metropolitendə istehsalat təcrübəsi kursunda praktiki bilik və bacarıqlarını artırırlar.Hazırda ADNSU-nun metalkəsmə ixtisası üzrə 3-cü kurs tələbələri hər birində 25 nəfər olmaqla 2 qrupda praktiki kursa cəlb olunublar.
"Nərimanov" elektrik deposunda keçirilən və iki ay davam edəcək məşğələlərdə tələbələrə müasir və dünya standartlarına cavab verən texnologiyalarla tanış olmaq və onlarla işləmək təcrübəsinə yiyələnmək imkanı yaradılıb. Təcrübə iştirakçıları xüsusi tərtib edilmiş proqrama uyğun olaraq, müasir diaqnostika kompleksinin fəaliyyəti, həmçinin yolun vəziyyətinə nəzarət, vaqonların cari və əsaslı təmiri sexlərində iş prosesinin təşkili, eləcə də maşinist trenajorunda, laboratoriyalarda və digər sahələrdə adi iş prosesini əyani müşahidə edirlər.
Metropolitenin real iş rejimi şəraitində və təlim-tədris mərkəzi mütəxəssislərinin nəzarəti altında keçirilən  məşğələlərdə tələbələrə seçdikləri peşə istiqamətləri üzrə bilikləri dərindən mənimsəmək üçün hər bir şərait yaradılıb.
Kursun sonunda tədris proqramını uğurla bitirən tələbələrə sertifikatlar təqdim olunacaq.





Bütün xəbərlər